Thursday, October 25, 2012

နိုင်ငံတော်ရဲ့လုံခြုံရေးကွန်ယက်အပေါ် ဆွေးနွေးခန်း - အပိုင်း (၂)

(စည်းလုံးခြင်းရဲ့အင်အား)


NIB အဖွဲ့အား လွှမ်းမိုးခဲ့ဖူးသော ဗိုလ်ချုပ်ကြီးခင်ညွန့်

အယ်ဒီတာ။ NIB ဖွဲ့ရင် အကျိုးရလဒ်များရှိသလို ဆိုးကျိုးများရှိလာနိုင်သလား။ အဲဒီဆိုးကျိုးတွေကို ဘယ်လိုကာကွယ် ထိန်းချုပ်သွားမလဲ ဗိုလ်မှူးကြီးခင်ဗျာ။

ဗိုလ်မှူးကြီး။ NIB ကို ဖွဲ့လိုက်တာဟာ သတင်းပေါင်းစုံကို သုံးသပ်ဆုံးဖြတ်လို့ ရတယ်ဗျ။ ထောက်လှမ်းရေးတစ်ဖွဲ့က တက်လာတဲ့ သတင်းဟာ အခြားထောက်လှမ်းရေးအဖွဲ့က အဲဒီသတင်းကို အတည်ပြုခြင်း၊ ထပ်မံဖြည့်စွက်ပေးခြင်း၊ သတင်းမှားဖြစ်လို့ ပယ်ဖျက်ခြင်း ပြုလုပ်နိုင်တယ်။ ထောက်လှမ်းရေးအဖွဲ့ တကယ်အလုပ်လုပ်နေတာ ဟုတ်/မဟုတ် အခြားထောက်လှမ်းရေးအဖွဲ့က တန်ပြန်ထောက်လှမ်းရေးအဖွဲ့အနေနဲ့ စိစစ်စစ်ဆေးတာမျိုး ပြုလုပ်သင့်တယ်။ နို့မိုရင် ထောက်လှမ်းရေးတစ်ဖွဲ့တည်းကိုသာ မှီခိုနေရတာမျိုး လုပ်နေရပါက သမ္မတဟာ ထောက်လှမ်းရေးရဲ့ ကြိုးဆွဲရာ ကရမလို ဖြစ်သွားတယ်။ ယခင် အစိုးရတွေလက်ထက်က MI စစ်ထောက်လှမ်းရေးဆိုရင် အစိုးရအဖွဲ့ကို ထိန်းချုပ်နိုင်တဲ့အထိ ဗိုလ်ချုပ်ကြီးခင်ညွန့် လက်ထက်က ဖြစ်ခဲ့တယ်။ အလားတူပဲ မျက်မှန်ကြီး ဗိုလ်မှူးချုပ်တင်ဦး လက်ထက်ကလည်း ထောက်လှမ်းရေးတို့ တန်ခိုးထွားခဲ့တယ်။ အထက်နားက စိစစ်ဆဲ သတင်းအရ ဗိုလ်မှူးချုပ်စိုးရှိန်ဟာ ထောက်လှမ်းရေးအဖွဲ့မှာ ပါခဲ့ရင် စစ်အာဏာရှင် ဗိုလ်ချုပ်မှူးကြီးဟောင်းသန်းရွှေရဲ့ လောင်းရိပ်မှ အစိုးရအနေနဲ့ လွတ်ကင်းသေးမှာမဟုတ်ဖူးဗျ။ ထိပ်ပိုင်းက လူကြီးတွေ ကြံရွယ်ထားနိုင်တာက ထောက်လှမ်းရေး အစီရင်ခံစာများအရ နိုင်ငံတွင်း ဖြစ်ပျက်ပြောင်းလဲမှုများ၊ ဆန္ဒပြအုံကြွမှု အရေးအခင်းများ၊ လွှတ်တော်အတွင်း ဥပဒေပြုပြင်ရေးကိစ္စများ၊ အချိန်နှင့် တပြေးညီသိရှိရသည့်အားလျော်စွာ နိုင်ငံတကာက ဖိအားပေးလာပါက ဗိုလ်ချုပ်မှူးကြီးဟောင်းသန်းရွှေအနေနဲ့ လုံခြုံရေးကို အကြောင်းပြပြီး အချိန်မီ ၀င်ရောက် စွက်ဖက်ခွင့် ရရှိအောင် ရည်ရွယ်ထားတာဖြစ်တယ်လို့ ထင်တယ်။ အဲဒီဆိုးကျိုးတွေကို ဘယ်လိုထိန်းချုပ်ရမလဲဆိုရင် လွှတ်တော်မှာ တရားဝင်ဖွဲ့စည်းခွင့်နဲ့ လုပ်ပိုင်ခွင့်တာဝန်ဥပဒေတစ်ရပ် ပြဌာန်းဖို့လိုတယ်။ အဖွဲ့ ဥက္ကဌအဖြစ် ပြည်ထဲရေးဝန်ကြီး တာဝန်ပေးမယ်ဆိုရင် တပ်မတော်ကာကွယ်ရေးဦးစီးချုပ်လိုမျိုး ထိပ်ပိုင်းက လူကြီးများက ၀င်ရောက်စွက်ဖက်ပိုင်ခွင့် မပြုသင့်တော့ဘူးဗျ။ လွတ်လပ်စွာ စီမံခန့်ခွဲခွင့်၊ လှုပ်ရှားခွင့်၊ ဥပဒေပြဌာန်းချက်နဲ့အညီ ဆောင်ရွက်ရမှာဖြစ်ပြီး ဘယ်အပိုင်းတွေကို လွှတ်တော်ကို တင်ပြခွင့်ပြုချက်တောင်းရန်နှင့် ဘယ်အပိုင်းကိုဖြင့် သမ္မတကိုသာ တင်ပြခွင့်ချက်တောင်းရန် ကွဲကွဲပြားပြားတာဝန်ပေးထားသင့်တယ်။ NIB ဖွဲ့ ဥက္ကဌကို စရဖက လွှမ်းမိုးမှု၊ SB ရဲသတင်းတပ်ဖွဲ့က ပြည်ထဲရေးဝန်ကြီးဖြစ်လို့ ပိုင်တယ်ဆိုပြီး လုပ်ချင်ရာလုပ်တယ်ဆိုကာ ထောင်လွှားလို့မရဘူးဗျ။ ကောင်းတာက ပြည်ထဲရေးဝန်ကြီးမဟုတ်ပဲ ထောက်လှမ်းရေး မဟာဗျုဟာ၊ နည်းဗျူဟာတွေကို နှံ့စပ်ကျွမ်းကျင်တဲ့ CIA ကျောင်းဆင်းလိုမျိုး ပုဂ္ဂိုလ်တစ်ဦးကို ခန့်ထားနိုင်ရင် အကောင်းဆုံးဖြစ်တယ်။ အဲဒီလူကိုလည်း လွှတ်တော်သက်တမ်းနဲ့အညီ ထိုင်ခုံမမြဲစေပဲ အလှည့်ကျ လဲပေးသင့်တယ်။

အယ်ဒီတာ။ နိုင်ငံတကာမှာ တပ်မတော်ကာကွယ်ရေးဦးစီးချုပ်ဟာ ထောက်လှမ်းရေးအဖွဲ့အစည်းတွေနဲ့ သီးခြားစီရှိနေရမှာဖြစ်ပြီး NIB အနေနဲ့ အစိုးရအဖွဲ့ရဲ့ သမ္မတ၊ ၀န်ကြီးချုပ်တို့က တိုက်ရိုက်တာဝန်ပေးတာကို လိုက်နာ အကောင်အထည်ဖော်ကြတာ တွေ့ရပါတယ်။ နိုင်ငံတကာ အရေးအခင်းတွေမှာပဲဖြစ်ဖြစ်၊ ပြည်တွင်းစစ် ကာလမှာပဲဖြစ်ဖြစ် ထောက်လှမ်းရေး အဖွဲ့အစည်းနဲ့ တပ်မတော်တို့ ပေါင်းစပ်ညှိနှိုင်းဆောင်ရွက်ကြတဲ့ အစဉ်အလာတော့ ရှိပါတယ်။ ဒါပေမဲ့ မြန်မာနိုင်ငံမှာတော့ လွတ်လပ်ရေး ရပြီးကတည်းက နိုင်ငံခြားမှ ထောက်လှမ်းရေးဘာသာရပ်နဲ့သင်တန်းကို တပ်မတော်ကသာစတင် လေ့ကျင့်သင်ကြားရယူခဲ့တာ မဟုတ်လား။ စစ်ထောက်လှမ်းရေးတွေ တန်ခိုးထွားလာတော့ တိုက်ပွဲထောက်လှမ်းရေးဆိုတဲ့ စစ်မြေပြင်သတင်းကို ဖော်ထုတ်နိုင်မှု အားနည်းလာတဲ့အပြင် ကိုယ့်တပ်ကိုကိုယ် ပြန်နင်းတဲ့ ဖြစ်စဉ်တွေ ဖြစ်လာပြီး တပ်မတော်က NIB ကို ဖျက်သိမ်းစေကာ ထောက်လှမ်းရေးကို ပြန်လည်အရေးယူရတဲ့ အဆင့်ထိ ရှုပ်ထွေးခဲ့ရတယ်ဗျာ။ အမျိုးသားညီလာခံမှာ ရေးဆွဲခဲ့တဲ့ အခြေခံဥပဒေမှာ NIB ဖွဲ့ဖို့ မပါခဲ့ဖူးထင်တယ်။

ဗိုလ်မှူးကြီး။ မပါခဲ့ဖူးဗျ။ NIB ဖွဲ့ခဲ့လျှင် အစိုးရအဖွဲ့နှင့် လွှတ်တော်များကို NIB ရဲ့ လုပ်ထုံးလုပ်နည်းအားတင်ပြရမှာမို့ နောင်မှာ မလိုလားအပ်တဲ့ ပြဿနာများနဲ့ ရှုပ်ထွေးနိုင်တဲ့ ဇာတ်လမ်းများ ထွက်ပေါ်လာဖွယ်ရှိတယ်ဗျ။ အခုတလော စရဖအားကိုးနဲ့တပ်ချုပ် ဒုဗိုလ်ချုပ်မှူးကြီး မင်းအောင်လှိုင်ဟာ တပ်မတော်အတွင်း တိုင်းမှူးများကို သူ့စိတ်ကြိုက် ပြောင်းရွှေ့ဖယ်ရှားခြင်း၊ ရာထူးနေရာများအပေါ် ဆွမ်းကြီးလောင်းလုပ်နေတဲ့အတွက် လက်ကိုင်တုတ်သဖွယ် လုပ်နေတာတော့ မကောင်းဖူးပေါ့ဗျာ။ MI အသွင်ပြောင်း စရဖတွေဟာ တိုင်းမှူးတွေရဲ့ စစ်ဆင်ရေးပေါ့လျော့မှု အစီရင်ခံစာဖြစ်ဖြစ်၊ SB ကဲ့သို့ နယ်ဘက်ထောက်လှမ်းရေး အဖွဲ့အစည်းများက တိုင်းမှူးများရဲ့ အဂတိလိုက်စားမှုဖြစ်စဉ်များကို တင်သွင်းခဲ့တာတွေကြောင့် တိုင်းမှူးများဟာ နေ့မြင်ညပျောက်ဆိုသလို ပြုတ်သူပြုတ်၊ ရွှေ့သူရွှေ့ ထိုင်ခုံပျောက်ရတဲ့ဘ၀ ကြုံတွေ့နေရပါတယ်။ တိုင်းမှူးတစ်ယောက်ဖြစ်ဖို့ဆိုရင် ယခင်အစိုးရများလက်ထက်က အရာရှိတွေဟာ အများကြီး ကြိုးစားရုန်းကန် ရင်းနှီးဖြတ်သန်းခဲ့ရတယ်ဗျ။ တိုင်းမှူးဖြစ်ပြီဆိုရင်လည်း သူ့ကို ပြန်ဖြုတ်ဖို့ မလွယ်ကူဘူးဗျ။ သတိပေးနဲ့ အရပ်ဖက် ၀န်ကြီးလောက်တော့ နှစ်သိမ့်ဆုပေးရတယ်။ ဆိုလိုတာက တပ်ချုပ် ဒုဗိုလ်ချုပ်မှူးကြီး မင်းအောင်လှိုင်ရဲ့ အာဏာနီတည်ဆောက်မှာ စရဖဟာ လက်ကိုင်တုတ်သဖွယ် အသုံးချခံနေရတယ်လို့ မြင်ပါတယ်။ တပ်မတော်ကို တပ်ချုပ် ဒုဗိုလ်ချုပ်မှူးကြီး မင်းအောင်လှိုင်ရဲ့ စိတ်ကြိုက်တည်ဆောက်ခဲ့ပြီးရင်တော့ NIB ဖွဲ့ဖြစ်ခဲ့ရင်လည်း သမ္မတနဲ့ တပ်ချုပ်တို့က NIB ကို သူ့တို့အာဏာတည်ဆောက်ရေးအတွက် အသုံးချနိုင်ခွင့်မပြုအောင် လွှတ်တော်က စောင့်ကြည့်ထိန်းချုပ်သွားဖို့ လိုအပ်တယ်ဗျာ။

အယ်ဒီတာ။ အခုလိုဆွေးနွေးသွားတာကို ကျေးဇူးတင်ရှိပါတယ် ဗိုလ်မှူးကြီးခင်ဗျား။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။