လက်ပန်းတောင်းတောင် ပိနေတဲ့ မြန်မာနိုင်ငံ ရဲတပ်ဖွဲ့

(စည်းလုံးခြင်းရဲ့အင်အား)

လက်ပန်းတောင်းတောင်သပိတ်စခန်းများအား ရဲတပ်ဖွဲ့မှ ၀င်ရောက်နှိမ်နှင်းစဉ်

၁။က လူထုဆန္ဒပြပွဲများ ဖြစ်ပွားလာပါက ပြည်ထဲရေးဝန်ကြီးဌာနက - လျှို့ဝှက်အဆင့် လူထု အဓိကရုဏ်း နှိမ်နှင်းရေး စီမံချက်ကို ရေးဆွဲထားခဲ့ရာ လက်ပန်းတောင်းတောင် ကိစ္စ စုံစမ်း စစ်ဆေးရေး ကော်မရှင်နှင့် နိုင်ငံရေး လေ့လာသူများ သုံးသပ်နိုင်ရန် အောက်ပါအတိုင်း ဖော်ပြပေးလိုက်ပါတယ်-

က(က)က စတင်ဖြစ်ပွားစဉ် ဆောင်ရွက်ခြင်း

(၁)        ရုန်းရင်းဆန်ခတ် အဓိကရုဏ်းများ စတင် ဖြစ်ပွားသည်နှင့် စုပေါင်းကွပ်ကဲမှုရုံးကို အချက်အခြာကျပြီး လုံခြုံမှုရှိသည့်နေရာကို ချက်ချင်းရွေးချယ်၍ ကွပ်ကဲဆောင်ရွက်သွားရမည်။

(၂)        ထိုသို့ ဖြစ်ပွားသည်နှင့် အသင့်စုဖွဲ့ထားသော ပြည်သူ့စွမ်းအားရှင်အဖွဲ့များကို ရှေ့တန်းမှ နေရာယူစေပြီး၊ ထိန်းသိမ်းဟန့်တား ဆောင်ရွက်သွားရမည်။

(၃)        ပြည်သူ့စွမ်းအားရှင်များ နောက်တွင် အဓိကရုဏ်းနှိမ်နှင်းရေးအဖွဲ့မှ တုတ်၊ ဒိုင်းကိုင် တပ်ဖွဲ့ဝင်များ နေရာယူစေရမည်။

(၄)        ဆူပူအုံကြွသူ လူစုလူဝေးအား ပြည်သူ့စွမ်းအားရှင်များမှ တားဆီးပြီး ခေါင်းဆောင် လုပ်သူများကို ၎င်းတို့၏ ဆန္ဒအား မေးမြန်း၍ အမြန် လူစုခွဲ၍ စည်းရုံးဆောင်ရွက်ရမည်။

(၅)        ထိုသို့ ဆောင်ရွက်စဉ် ခေါင်းဆောင်လုပ်သူများအပါအဝင် ဆူပူမှု၌ ပါဝင်လှုပ်ရှားသူများအား လျှို့ဝှက်စွာ ဓာတ်ပုံ/ ဗွီဒီယိုမှတ်တမ်းများ ရိုက်ကူးခြင်း၊ သံဆူးကြိုး စသည့် အတားအဆီးများ ချထားခြင်း ဆောင်ရွက်ရမည်။

(၆)        လူစုခွဲရန် စည်းရုံးပြောဆို အမိန့်ပေးခြင်းကို မလိုက်နာပါက မီးသတ်ရေပိုက်များဖြင့် ပက်ဖြန်းခြင်း၊ အင်အားသုံး ဖြိုခွဲခြင်းများ ဆောင်ရွက်ရမည်။

(၇)        ဟန့်တားလူစုခွဲသည့် စွမ်းအားရှင်များကို ဆူပူအုံကြွသူများမှ ရန်ပြုလာပါက အဓိကရုဏ်း တပ်ဖွဲ့မှ တုတ်၊ ဒိုင်းများဖြင့် စည်းကမ်းတကျ တည်ငြိမ်စွာ ချီတက် ဟန့်တားပြပြီး၊ လူစု ကွဲသွားစေရန် ဆောင်ရွက်ရမည်။

(၈)        ထိုသို့ဆောင်ရွက်ခြင်းဖြင့် တားဆီးမရပါက လူစုလူဝေးကို ဖြိုခွဲရန် ရာဘာတုတ်ဖြင့် ရိုက်နှက် နှိမ်နှင်းပြီး ဖမ်းဆီး ရနိုင်သမျှကို ကျင့်ထုံးဥပဒေပုဒ်မ - ၁၂၈ နှင့်အညီ ဆောင်ရွက်ရမည်။

(၉)        အထက်ပါ ဆောင်ရွက်ချက် အားလုံးကို အာဏာပိုင်အဖွဲ့အစည်း၊ အမိန့်ပေးနိုင်သော အဖွဲ့အစည်းများ၏ အမိန့်အရ ဆောင်ရွက်သွားရမည်။

 ပြည်ထဲရေးဝန်ကြီးဌာန ၀န်ကြီး ဒုတိယဗိုလ်ချုပ်ကြီးကိုကို

က(ခ)က သေနတ်ဖြင့် ပစ်ခတ်လူစုခွဲခြင်း။ အောက်ပါအတိုင်း ဆောင်ရွက်ရမည်-

(၁)        အဓိကရုဏ်းအုပ်စုတွင် မိမိတပ်ဖွဲ့အား အန္တရာယ်ပြုနိုင်သော တုတ်၊ ဓား၊ ဂျင်ကလိစသည့် လက်နက်များ အလွယ်တကူ ဝှက်ယူလာနိုင်သဖြင့် သတိပေးစည်း (၃) စည်းတားပြီး လူအုပ်စု ရှေ့ဆက်တိုးလာပါက သေနတ်ဖြင့် ပစ်ခတ်တားဆီးမည် ဖြစ်ကြောင်း အသံချဲ့စက်ဖြင့် ပြောကြားဟန့်တားသွားရမည်။

(၂)        ထိုသို့ သတိပေးပြောကြားနေသည်အထိ လူစုမကွဲသေးပါက သေနတ်ကိုင်တပ်ဖွဲ့မှ လူအုပ်အတွင်းသို့ မျက်ရည်ယိုဗုံး အသုံးပြု၍ ပစ်ခတ်လူစုခွဲစေရမည်။

(၃)        လူစုပြိုကွဲသွားခြင်း မရှိသေးပါက ရာဘာကျည်အသုံးပြု၍ လူအုပ်စု၏ ရှေ့တန်းကို ဖြန့်ခွဲပစ်ခတ်သွားရမည်။

(၄)        ထပ်မံ တိုးလာပါက အဆိုပါလူစု၏ ခေါင်းဆောင်လုပ်သူအား ရွေးချယ်ပြီး ရိုင်ဖယ်သေနတ်ဖြင့် ကျည်စစ်အသုံးပြုကာ ခန္ဓာကိုယ်အောက်ပိုင်းသို့ ထိအောင် ပစ်ခတ်သွားရမည်။

(၅)        ထိုသို့ပစ်ခတ်ရာတွင် မောင်းပြန်ရိုင်ဖယ်အား အသုံးမပြုစေဘဲ၊ ရိုင်ဖယ်သေနတ်ဖြင့်သာ တစ်တောင့်ချင်းပစ်ခတ် အသုံးပြုစေရမည်။

(၆)        လူစုကွဲလျှင် (သို့) လူစုကွဲပြီဟု ယူဆသောအခါ ပစ်ခတ်ခြင်းကို ရပ်စဲရမည်။

(၇)        အဓိကရုဏ်းတပ်ဖွဲ့မှ လူစုလူဝေးအတွင်း ပါဝင်သူများအား ဖမ်းဆီးနိုင်သမျှ ဖမ်းဆီးပြီး သေဆုံးသူ၊ ဒဏ်ရာရရှိသူများအား စနစ်တကျ မှတ်တမ်းပြုစု၍ သက်ဆိုင်ရာ ဆေးရုံသို့ တင်ပို့သွားမည်။

(၈)        ဖြစ်စဉ်အားလုံးအား ဓာတ်ပုံ၊ ဗွီဒီယိုမှတ်တမ်းများ ရိုက်ကူး၍ အစီရင်ခံစာနှင့်အတူ အထက်ဌာနအဆင့်ဆင့်သို့ တင်ပြသွားရမည်။

က(ဂ)က အရေးကြီးချိန် ဆောင်ရွက်ခြင်း။

လူစုလူဝေးအား စွမ်းအားရှင်၊ အဓိကရုဏ်း တပ်ဖွဲ့ဝင်များဖြင့် ဖြိုခွဲမရသော အချိန်ကို အရေးကြီးအချိန်အဖြစ် သတ်မှတ်၍ အောက်ပါအတိုင်း ဆောင်ရွက်သွားရမည်-

(၁)က လူစုလူဝေးအား ပြည်သူ့စွမ်းအားရှင်၊ အဓိကရုဏ်းတပ်ဖွဲ့ဝင်များဖြင့် ဖြိုခွဲမရပါက လုပ်ထုံးလုပ်နည်းနှင့်အညီ တပ်မတော်သို့ လွှဲပြောင်းပေး၍ အများပြည်သူများ အကျိုးငှာ တပ်မတော် အင်အားဖြင့် ဖြိုခွဲရမည်။

(၂)က တပ်မတော်သို့ လွှဲပြောင်းပြီးနောက် မြန်မာနိုင်ငံ ရဲတပ်ဖွဲ့သည် အောက်ပါအတိုင်း ဆောင်ရွက်သွားရမည်-

                (ကက) မိမိအင်အားကို ပြန်လည် စုဖွဲ့ရမည်။

                (ခခ) တပ်မတော်မှ တောင်းခံလာသော အကူအညီများကို ပေးရမည်။

                (ဃဃ) လူနာစောင့်ခြင်း၊ ဆေးရုံပို့ခြင်း၊ လူနာမှတ်တမ်းတင်ခြင်း စသည့် အုပ်ချုပ်မှုဆိုင်ရာ ကိစ္စရပ်များကို သက်ဆိုင်ရာ အဖွဲ့အစည်းများဖြင့် ပူးပေါင်းဆောင်ရွက်ရမည်။

                (ငင) တပ်မတော်မှ လူစုခွဲပြီးသည့် နောက်ပိုင်းတွင် အခြေအနေကို မည်သို့ ဆက်လက် ထိန်းသိမ်းသွားရမည်ကို အထက်ဌာန အဆင့်ဆင့်သို့         တင်ပြ ဆောင်ရွက်သွားရမည်။

 လက်ပန်းတောင်းတောင် ကြေးနီးစီမံကိန်း ရပ်တန့်ရေးအတွက် ရန်ကုန်မြို့၊ တရုတ်သံရုံးရှေ့တွင် ဆန္ဒထုတ်ဖော် ပြသနေသူများအား မြန်မာနိုင်ငံ ရဲတပ်ဖွဲ့ဝင်များမှ တားဆီးနေစဉ်

၂။က အဓိကရုဏ်းနှိမ်နှင်းရေးစီမံချက် စနစ်တကျ အကောင်အထည်ဖော်နိုင်ရန် ရဲတပ်ဖွဲ့ဝင်များအား လက်တွေ့ လေ့ကျင့်စမ်းသပ်မှုများအား စစ်တပ် လက်အောက်ခံ တန်းမြင့် လေ့ကျင့်ရေးသင်တန်းကျောင်းတွေမှာ အထိုက်အလျောက် ဇာတ်တိုက် ပြုလုပ်ခဲ့တယ်လို့ သိရပါတယ်။ ရွှေဝါရောင်တော်လှန်ရေးကြီးလိုမျိုး ထုထည်ကြီးမားစွာ ကြုံတွေ့ လာရတဲ့အခါတွင် စစ်တပ်အား နောက်မှ ရံပေးဖို့ စစ်ကူခေါ်ရတဲ့အထိ ဖြစ်သွားပါတယ်။ ရခိုင်ပြည်နယ်၊ ဘင်္ဂလီ အရေးအခင်းမှာ အရင်ကနဦး လက်နက်မဲ့ ဆန္ဒပြသူများ၊ နောက်ပိုင်းတွင် တုတ်၊ ဓား၊ လက်နက်များ ပါဝင် လာလို့ လက်နက်နဲ့ ပစ်ရှင်းရတဲ့အထိ ဖြစ်လာပြီး စစ်တပ်ကိုပါ စစ်ကူတောင်းရကာ သွေးထွက်သံယို ဖြစ်ပွားသည့် ဖြစ်စဉ်များ ရှိခဲ့ပါတယ်။

၃။က လက်ပန်တောင်းတောင် သွေးထွက်သံယို ဖြစ်စဉ်များမှာ ရွှေဝါရောင် တော်လှန်ရေးတွင် ဖြစ်ပွားခဲ့သည့် သွေးထွက်သံယို ဖြစ်စဉ်များထက် ပိုမို ဆိုးဝါးတာ တွေ့ရပါတယ်။ ရွှေဝါရောင် တော်လှန်ရေး ကာလတုန်းက စက်တင်တင်ဘာ (၂၆/၂၇/၂၈/၂၉) လေးရက်တာမှာ ရန်ကုန်မြို့က ဆန္ဒပြတဲ့ သံဃာတော်တွေနဲ့ ပြည်သူတွေကို ပစ်ခတ် နှိမ်နှင်းဖို့ ရဲတပ်ရင်း (လုံထိန်း) တွေ သုံးခဲ့တဲ့ ဗုံးသီးနဲ့ ကျည်ပမာဏဟာ မျက်ရည်ယိုဗုံး (၃၁၃) လုံး၊ မီးခိုးဗုံး (၂၀၆) လုံး၊ အမ် (၄၀) မမဗုံးသီး (၃၆၉) လုံး၊ (၁၂) ဗို့ကျည် (၁၆၇) တောင့်၊ ဒဿမ(၃၀၃) ကျည် (၁၈) တောင့်၊ ဒဿမ(၃၀) ကာဘိုင်ကျည်(၂) တောင့်နဲ့ (၇.၆၂) ကျည် (၃၆) တောင့် သုံးစွဲမှု ရှိခဲ့တယ်လို့ သိရပါတယ်။ ထိုစဉ်က ရန်ကုန်မြို့တော်အတွင်း ဆန္ဒပြခဲ့ကြတဲ့ ရဟန်းသံဃာ၊ လူထုအင်အားဟာ သိန်းနှင့်ချီပြီး ရှိတာမို့ အဆိုပါ သုံးစွဲခဲ့တဲ့ ဗုံးသီးနဲ့ ကျည်ပမာဏများပြားခဲ့ပေမဲ့ ထိခိုက် ဒဏ်ရာရသွားတဲ့ သံဃာတော်များဟာ နဖူးနှင့် ခေါင်းလိုနေရာမျိုးမှာသာ ဒဏ်ရာ ရသွားခဲ့ပြီး လက်ပန်းတောင်းတောင် အရေးအခင်းရှိ သံဃာတော်များကဲ့သို့ အရေပြား မီးလောင် ဒဏ်ရာရသွားတဲ့ ဖြစ်စဉ်မျိုး မရှိခဲ့တာကို တွေ့ရှိရပါတယ်။ ရွှေဝါရောင် တော်လှန်ရေး ကာလအတွင်း ရဲတပ်ဖွဲ့ဝင်များ ပစ်ခတ်သည့်ပုံစံမှာ မျက်ရည်ယိုဗုံးများအား မြေပြင်ကို ရှပ်၍ ပစ်ခြင်း၊ မိုးပေါ်ထောင်ပစ်ခြင်း စတာတွေကို ပြုလုပ်ခဲ့လို့သာ တိုက်ရိုက် ထိမှန်ခြင်း မရှိသဖြင့် အရေပြား မီးလောင်ဒဏ်ရာ ရသွားတာမျိုး  မတွေ့ရတာ ဖြစ်ပါတယ်။

 ရမည်းသင်းမြို့ရှိ ရဲတပ်ဖွဲ့ လေ့ကျင့်ရေး သင်တန်းကျောင်း

လက်ပန်းတောင်းတောင် အဓိကရုဏ်းနှိမ်နှင်းမှုမှာ ပါဝင်ခဲ့တဲ့ ရဲတပ်ဖွဲ့ဝင်များအနေနဲ့ လူထုကို ဖြိုခွဲရာမှာ စီမံချက်ပါ ပထမဆုံးအဆင့်ဖြစ်တဲ့ ရေထုပမာဏကို လုံလောက်စွာ မသုံးစွဲခြင်း၊ မြေပြင်ကိုရှပ်၍ ပစ်ခြင်း၊ မိုးပေါ်ထောင်ပစ်ခြင်း စသည်တို့ဖြင့် သွယ်ဝိုက်မပြုလုပ်ပဲ လူထုအား တိုက်ရိုက်အနီးကပ် ဒဲ့ပစ်ခတ်ခဲ့ဟန် တူပါတယ်။ မျက်ရည်ယိုဗုံးကို မိုးပေါ် ထောင်ပစ်ရာမှာ ၉၀ ဒီဂရီ နီးပါး ထောင်ပစ်ဖို့ လိုကြောင်း သိရှိရပါတယ်။ နောက်တခု ဖြစ်နိုင်သည်မှာ မျက်ရည်ယိုဗုံးသဘာဝတွင် အခိုးအငွေ့သာထွက်ပြီး မျက်လုံးကိုသာ တိုက်ရိုက် သက်ရောက်မှုရှိသော်လည်း ယခုအသုံးပြုတဲ့ဗုံးတွင် မျက်ရည်ယိုဗုံးမဟုတ်ပဲ မီးလောင်မှုကို အားပေးသော အခြားဗုံး တလုံး ဖြစ်နေတတ်ရာ မူလကတည်းက ကြိုတင်စစ်ဆေး စမ်းသပ်သုတေသန မပြုလုပ် ထားခြင်းကြောင့် မျက်ရည်ယိုဗုံးများနဲ့ ရောပြီး မှားယွင်း ထည့်သွင်းပစ်မိခြင်းလည်း ဖြစ်နိုင်ပါတယ်။ ရှေ့တန်းတိုက်ပွဲများတွင် ခွင်းကျည်နဲ့ ဖောက်ကျည်မှာပြီး ပစ်ခတ်သွားတဲ့ သာဓက ရှိပါတယ်။ ဒါ့အပြင် စစ်ကိုင်းမှာ စုဖွဲ့ထားတဲ့ ရဲတပ်ရင်းစု ကွပ်ကဲရေးမှူးရုံး လက်အောက်ခံ ရဲတပ်ဖွဲ့ဝင် အများစုဟာ တပ်မတော်မှ အသွင်ပြောင်းထားတဲ့ စစ်သည်အင်အားတွေ ဖြစ်တာမို့ စစ်သားပီပီ Down Attack၊ လှံစွပ်ထိုးချေမှုန်းတဲ့ ပုံစံမျိုးလုပ်သွားတာ ဖြစ်ပါတယ်။ ရဲများဟာ စည်းကမ်းပျက်ပြီး စနစ်တကျမရှိဟု သုံးသပ်နေကြတဲ့ စစ်တပ်က ဗိုလ်ချုပ်များအနေနဲ့ ရဲကို ဇာတ်သွင်းကာ သွတ်သွင်းပေမဲ့ ပိုပြီး ဇာတ်ပျက်သွားကြောင်း တွေ့ရှိရပါတယ်။

အဆိုးဝါးဆုံး တွေ့ရှိချက်မှာ စစ်တပ်ရော ရဲတပ်ဖွဲ့ဝင်တွေပါ စီမံချက်ပေါင်းစုံ၊ ထောင့်စေ့အောင် စီစဉ် ရေးဆွဲထားသည်ဟု သိရှိရသော်လည်း သပိတ်စခန်းသိမ်းတိုက်ပွဲ စီမံချက်လိုမျိုး ပီပီပြင်ပြင် မရှိသေးကြောင်း၊ ရှိရင်လည်း ဇာတ်တိုက်လေ့ကျင့်မှုလုပ်မှာ မဟုတ်ကြောင်း သိရှိရပါတယ်။ ယခု ဇာတ်တိုက် လေ့ကျင့်ထားတဲ့ အဓိကရုဏ်းနှိမ်နှင်းရေးစီမံချက်ဟာ လမ်းမပေါ်ရှိ လှုပ်ရှားနေတဲ့ ဆန္ဒပြလူထုအား ကိုင်တွယ်ဖြေရှင်းရန်စီမံချက်ကိုသာ အာရုံစိုက်ခဲ့တယ်လို့ သုံးသပ်တွေ့ရှိရပါတယ်။ သပိတ်စခန်းသိမ်းစီမံချက်ကို ၁၉၈၈ ခုနှစ် အရေးအခင်းများမှာ ရှိကောင်းရှိခဲ့ပေမဲ့ စစ်တပ်နှင့် ရဲများက ပီပီပြင်ပြင် ရေးဆွဲထားဟန်မတူကြောင်း စစ်ဖက်နီးစပ်သူများက ဆိုပါတယ်။ အဓိကရုဏ်းနှိမ်နှင်းရေးစီမံချက်ကို အကောင်အထည်ဖော်ရာတွင်လည်း လမ်းပေါ်တွင် ဆန္ဒပြသူများအား ရန်ကုန်တိုင်း ရဲတပ်ဖွဲ့၊ ဒုတိုင်းတပ်ဖွဲ့မှူး ဒုရဲမှူးကြီး သက်လွင်က စီမံချက်ပါ လုပ်ငန်းစဉ် အဆင့်လိုက် ဆောင်ရွက်ခြင်း မပြုဘဲ ရုပ်ပျက်ဆင်းပျက် ကားပေါ်ဆွဲတင်တဲ့အထိ လက်လွတ်စပယ် လုပ်ခဲ့တာ တွေ့ရပါတယ်။ အထူးသဖြင့် လက်ပန်းတောင်းတောင် သပိတ်စခန်းများကို သိမ်းယူရမဲ့ ညွှန်ကြားချက် ပေးတာနဲ့တပြိုင်နက် အဓိကရုဏ်းနှိမ်နှင်းဖို့ စနစ်တကျ လေ့ကျင့်ထားတဲ့ ရဲတပ်ရင်း (၇) လိုမျိုးကို အမြန်လမ်းကြီးမှတဆင့် ညတွင်းချင်းရွှေ့ပြောင်းခိုင်းလို့ ရရက်သားနဲ့ မလုပ်သွားနိုင်တာဟာ ပြည်ထဲရေးဝန်ကြီးနဲ့ စစ်ကိုင်းတိုင်းဒေသကြီး ၀န်ကြီးချုပ် ဦးသာအေးအပေါ်မှာ တာဝန်ရှိပါကြောင်း စည်းလုံးခြင်းရဲ့အင်အား ၀က်ဘ်ဆိုဒ် မှ တဆင့် တင်ပြလိုက်ပါတယ်။