Wednesday, November 19, 2014

တပ်မတော်၏ ထိန်းချုပ်ခံခေတ် ပြောင်းချိန်တန်ပြီ

(ဧရာဝတီ)

၂၀၀၈ ဖွဲ့စည်းပုံ အခြေခံ ဥပဒေ ပြင်ဆင်ရေး ပြည်ထောင်စု လွှတ်တော် တွင်း ယခုအပတ် အကြိတ်အနယ် ဆွေးနွေးကြရာ တပ်မတော် ကိုယ်စားလှယ် များက အတိုက်အခံ အမျိုးသား ဒီမိုကရေစီ အဖွဲ့ချုပ် ကိုယ်စား လှယ် များ အား ဦးတည်၍ ဒေါ်အောင်ဆန်းစုကြည် သမ္မတဖြစ်မည့် အရေး တားဆီးထားသော ပုဒ်မ ၅၉ (စ) နှင့် ဖွဲ့စည်းပုံ အခြေခံဥပဒေ ပြင်ဆင်ရေး အခရာကျသော ပုဒ်မ ၄၃၆  မပြင်ဆင်လိုကြောင်း အခိုင်အမာပြောဆိုပြီး အကယ်၍ ပြင်ဆင်ခဲ့ပါက မြန်မာနိုင်ငံ ပြိုကွဲပျက်စီးသွားမည်ဟု သတိပေးခြင်းသည် အနာဂတ်မြန်မာ့နိုင်ငံရေးတွင် တပ်မတော်က ဆက်လက်ချုပ်ကိုင်မည်ဆိုသည်ကို ရှင်းလင်းစွာ အသိပေးခြင်းပင်။


၂၀၁၁ ခုနှစ်မှ စတင်ခဲ့သော မြန်မာ့နိုင်ငံရေး စီးပွားရေး ပြုပြင်ပြောင်းလဲမှုတွင် တပ်မတော်၏ ပါဝင်ချုပ်ကိုင်ထားခြင်းအား အနာဂတ်တွင် လျှော့ချသွားမည်ဟု ကတိပေးထားခဲ့ခြင်းသည် တဖြည်းဖြည်း မှေးမှိန်နေရာက ယခုအချိန်တွင်မူ ယုံရခက် သွားပေပြီ။ တပ်မတော်သား လွှတ်တော်ကိုယ်စားလှယ်တဦးက “ပြည်တွင်းငြိမ်းချမ်းရေး လုပ်ငန်းစဉ်များ တိုးတက်မှု ထင်သာမြင်သာရှိအောင် မဆောင်ရွက်နိုင်ခြင်း၊ နိုင်ငံရေး အင်အားစုများ ရင့်ကျက်မှု အားနည်းခြင်း၊ ပြည်သူများ ဥပဒေနှင့် စည်းကမ်းလိုက်နာမှု အားနည်းခြင်း၊ ဒီမိုကရေစီကို အကြောင်းပြပြီး ပြည်သူကို အသုံးချနေခြင်းတို့က ဒီမိုကရေစီစနစ်ကို ကူးပြောင်းရေး လုပ်ငန်းစဉ်များ တည်ငြိမ် ချောမွေ့မှုကို အန္တရာယ် ရှိနေဆဲအခြေအနေ” ဟု ဆိုလိုက်ခြင်းသည်လည်း တိုင်းရင်းသားများ၊ ဒီမိုကရေစီလိုလားသော နိုင်ငံရေးပါတီ အဖွဲ့အစည်းများနှင့် မဲဆန္ဒရှင်များသာမက နိုင်ငံတကာမိသားစုနှင့် အဆုံးစွန်ဆိုရလျှင် သမ္မတ ဦးသိန်းစိန်အစိုးရတို့၏ စိတ်စေတနာများကို အသိအမှတ်မပြုရာ ကျပါသည်။

ဒီမိုကရေစီရေး ပြုပြင်ပြောင်းလဲမှု ရှေ့ဆက်မတိုးဘဲ ရပ်တန့်နေခြင်းသည် တပ်မတော်က ၂၀၀၈ ဖွဲ့စည်းအုပ်ချုပ်ပုံ အခြေခံဥပဒေအရ ထိန်းချုပ်ထားခြင်းကြောင့် ဖြစ်သည်ဟု ဝေဖန်သံများ ယခုအချိန် ပေါ်ထွက်လာနေသည်။ ၂၀၁၅ ရွေးကောက်ပွဲကို ကျင်းပပေးမည်ဟု ကတိပြုထားသော်လည်း မဲဆန္ဒရှင် အများစုက လိုလားနေသော ဒေါ်အောင်ဆန်းစုကြည် သမ္မတဖြစ်ခွင့် မရှိခြင်းသည် ဒီမိုကရေစီမဆန်ဘဲ မျှတမှု ကင်းနေကြောင်း ထောက်ပြပြောဆိုနေသည်။ တပ်မတော်သည် လက်ရှိ ၂၀၀၈ ဖွဲ့စည်းပုံကို ထိန်းထားလိုသည်သာမက အာဏာကို ပို၍ပင် လိုအပ်လာနေကြောင်း အမျိုးသားကာကွယ်ရေးနှင့် လုံခြုံရေးကောင်စီ (ကာလုံ)က လွှတ်တော်ကို ဖျက်သိမ်းရန် အကြံပေးနိုင်သည်ဆိုသော အချက်အပါအဝင် ဖွဲ့စည်းပုံတွင် ထပ်ဖြည့်လိုသော အချက်များ တင်သွင်းလာခြင်းကလည်း သက်သေပြနေသည်။ ယင်းအချက်က အနာဂတ် အစိုးရနှင့် လွှတ်တော်များသည် တပ်မတော်၏ ထိန်းချုပ်မှုအောက်၌သာ ရှိနေရမည်ဟု ဆိုလိုခြင်းပင်။

၂၀၀၈ ဖွဲ့စည်းပုံ ပြင်ဆင်ရေးသည် ပြည်တွင်းစစ် ရပ်စဲရေး ငြိမ်းချမ်းရေးတည်ဆောက်မှု လုပ်ငန်းစဉ်နှင့်လည်း တိုက်ရိုက်သက်ဆိုင်နေသည်။ အမျိုးသား တန်းတူရေးနှင့် ကိုယ်ပိုင်ပြဌာန်းခွင့်ကို ဥပဒေကြောင်းအရ အာမမခံနိုင်မှသာ ငြိမ်းချမ်းရေးဆွေးနွေးဝိုင်းများ ရှေ့ဆက်နိုင်မည်ဖြစ်ကြောင်း တိုင်းရင်းသားလက်နက်ကိုင်အဖွဲ့များက တောင်းဆိုနေသောကြောင့် အပစ်အခတ် ရပ်စဲရေးတွင် ပါဝင်သည့် လက်နက် ဖြုတ်သိမ်းရေးနှင့် လုံခြုံရေး ဆိုင်ရာ များကို နိုင်ငံရေး ဆွေးနွေးပွဲများပြီးမှ ပြုလုပ်ရန် သမ္မတ ဦးသိန်းစိန်က သဘောတူလိုက်သည်။ သို့သော် ဖွဲ့စည်းပုံအခြေခံဥပဒေ ပြင်ဆင်ရေးတွင် ပြဌာန်းထားသော မူဘောင်အတွင်းမှသာ ဖြစ်ရမည်ဟူသော တပ်မတော်၏ ရပ်တည်ချက်မှာ သမ္မတ ဦးသိန်းစိန် အစိုးရ၏ အပစ်အခတ်ရပ်စဲရေး လုပ်ငန်းစဉ်ကို အရိပ်မိုးနေသဖြင့် သဘောတူညီချက် တစုံတရာ ရနိုင်ရေး အလှမ်းဝေးနေမည်ဟု အဓိပ္ပါယ်ထွက်နေသည်။

နှစ်ပေါင်း ၅၀ ကျော်ကြာ တပ်မတော်က နိုင်ငံရေးတွင် ဝင်ရောက်ထိန်းချုပ်ခဲ့ခြင်းကြောင့် တိုင်းပြည်နှင့် လူမျိုး အောက်တန်းနောက်တန်းကျခဲ့ပြီးဖြစ်သည်ကို မည်သူမျှ အငြင်းမပွားကြတော့ပေ။ 

လက်ရှိမြန်မာနိုင်ငံသည် အိမ်နီးချင်းများနှင့်နှိုင်းလျင်ပင် နောက်ကျကျန်ရစ်နေသောကြောင့် တိုင်းပြည် ပြန်လည်ထူထောင်ရေး အရှိန်အဟုန်ဖြင့် လုပ်ဆောင်သင့်နေပြီဟူသည်မှာ နိုင်ငံသား အားလုံး၏ မျက်မှောက်ခေတ် ဆန္ဒဖြစ်သည်။ ဤနေရာတွင် လွတ်လပ်ရေးအကြိုခေတ် တိုင်းပြည်ခေါင်းဆောင်လည်းဖြစ် တပ်မတော်ခေါင်းဆောင်လည်း ဖြစ်ခဲ့သူ ဗိုလ်ချုပ်အောင်ဆန်းသည် ထိုအချိန်က အနောက်နိုင်ငံများနှင့် ယှဉ်လျှင် နောက်ကျန်နေခဲ့သော မြန်မာနိုင်ငံအား “သူများတလှမ်းလှမ်းရင် ကျနော်တို့က လေးငါးဆယ်လှမ်း လှမ်းနိုင်မှ” ဟု တိုက်တွန်းခဲ့ခြင်းကို သတိရမိသည်။ ထို့ကြောင့် သူများနှင့်အမီလိုက်နိုင်ရေး ယခုအခါ လေးငါးဆယ်လှမ်းမျှမက လှမ်းရတော့မည်မှာ ပြောစရာပင် မလိုချေ။ ထိုသို့ လှမ်းနိုင်ရန် နိုင်ငံကို တပ်မတော်မှ ထိန်းချုပ်ထားခြင်းအား ဖြေလျော့ပေးချိန် တန်ပြီဟု တိုက်တွန်းရေးသားအပ်ပေသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။