တပိုတိုက်ပွဲ အတွေ့အကြုံ - အပိုင်း (၁) (ရှစ်လေးလုံး ငွေရတု အထိမ်းအမှတ် ဂုဏ်ပြုဆောင်းပါး)

(စည်းလုံးခြင်းရဲ့အင်အား)

မြန်မာနိုင်ငံလုံး ဆိုင်ရာ ကျောင်းသားများ ဒီမိုကရက်တစ် တပ်ဦး ABSDF ဂုဏ်ပြုခံ တပ်ဖွဲ့ဝင်များ

ဆောင်းပါးရှင် - ကိုကျော်ထင်

အယ်ဒီတာအဖွဲ့၏ တင်ပြချက်။      ။ ဤ၀က်ဘ်ဆိုဒ်၏ ပင်တိုင် ဘာသာပြန်ဆောင်းပါးရှင် ကိုကျော်ထင်သည် ABSDF ကျောင်းသားတပ်မတော်တွင် ထိပ်ပိုင်း ရာထူးတာဝန်ကို ထမ်းဆောင်ခဲ့သည့်နည်းတူ အောက်ခြေစစ်မြေပြင် တိုက်ပွဲအတွေ့အကြုံများကိုလည်း အထိုက်အလျောက် ရယူနိုင်ခဲ့သူ ဖြစ်ပါသည်။ သူ၏ တပိုတိုက်ပွဲ အတွေ့အကြုံကို ပေးပို့လာရာ န၀တခေတ် အမျိုးသားညီလာခံအား အတုအယောင်ညီလာခံ ဖြစ်ကြောင်း နိုင်ငံရေးအရ မီးမောင်းထိုးပြကာ လှုပ်ရှား အကောင်အထည်ဖေါ်နိုင်ခဲ့ပြီး စစ်ရေးအရလည်း အောင်မြင်ခဲ့သော တိုက်ပွဲတစ်ပွဲဖြစ်သောကြောင့် ရှစ်လေးလုံးအရေးတော်ပုံအကြို ဂုဏ်ပြု ဖေါ်ပြပေးလိုက်ပါသည်။ ကျနော် အေဘီအက်စ်ဒီအက်ဖ် ကျောင်းသားတပ်မတော်သားဘ၀ ဖြတ်သန်းစဉ်ကာလ ဗဟို စစ်ရေးဌာနတွင် စစ်ရေးဌာန အတွင်းရေးမှူး အထိ တာဝန် ထမ်းဆောင်ခဲ့ဖူးသော်လည်း တိုက်ပွဲ အတွေ့အကြုံမှာ အနည်းငယ်သာ ရှိပါတယ်။ ထိုတိုက်ပွဲ အတွေ့အကြုံများမှာ ကော့မူးရာ ၀မ်းခစခန်း တိုက်ပွဲအတွေ့အကြုံ၊ ဥူးသုထတိုက်ပွဲ အတွေ့အကြုံနဲ့ တပိုတိုက်ပွဲ အတွေ့အကြုံတို့ ဖြစ်ကြပါတယ်။ ကျနော့်အနေဖြင့် ပထမတိုက်ပွဲ (၂) ခု ဖြစ်တဲ့ ကော့မူးရာဝမ်းခနဲ့ ဥူးသုထတိုက်ပွဲ အတွေ့အကြုံများကို ရေးသား မှတ်တမ်းတင်ခြဲ့ပီး ဖြစ်ပါတယ်။

မြန်မာနိုင်ငံလုံး ဆိုင်ရာ ကျောင်းသားများ ဒီမိုကရက်တစ် တပ်ဦး ABSDF တပ်ဖွဲ့ဝင်များ

ဒီတခါတော့ ကျနော်ရေးမယ်လို့ အချိန်အတော်ကြာ ကတည်းက ရည်ရွယ်ထားခဲ့တဲ့ တပိုတိုက်ပွဲ အတွေ့အကြုံကို တင်ပြသွားပါ့မယ်။ ကျနော့်တိုက်ပွဲ အတွေ့အကြုံ ဆိုတာကလည်း ရန်သူနဲ့ နှစ်ဘက် မျက်နှာချင်းဆိုင် သူပစ်ကိုယ်ပစ် အနေအထားမျိုးအထိ ကျနော် တစ်ကြိမ်တစ်ခါမှ မကြုံဆုံခဲ့ဖူးပါ။ သို့သော်လည်း လက်နက်တွေနဲ့ ပစ်ခတ်နေတဲ့ အသံတွေ ကြားနေရတယ်။ ဒီပစ်ခတ်တဲ့ လက်နက်တွေရဲ့ ထိရောက်တဲ့ ဧရိယာ အ၀န်းအ၀ိုင်းအတွင်းမှာ ကျနော်ရှိနေတယ်။ ယခု နောက်ဆုံးတင်ပြမဲ့ တပိုတိုက်ပွဲမှာတော့ ဘယ်လိုရန်သူကို တုန့်ပြန် တိုက်ခိုက်သင့်တယ်လို့ ဆုံးဖြတ်ချက်ချတဲ့ အ၀န်းအ၀ိုင်းတွင်မှာ ပါဝင်ခဲ့တဲ့ အခြေအနေတွေ အပေါ်မှာ မူတည် ရေးသားထားတဲ့ တိုက်ပွဲအတွေ့အကြုံတွေပဲ ဖြစ်ပါတယ်။ တပိုဆိုတဲ့ နေရာကတော့ မြန်မာပြည်တောင်ပိုင်း တနင်္သာရီတိုင်း ပုလောမြို့နယ် ပုလောနဲ့ မြိတ်အကြားက ရွာလေးတစ်ရွာပဲ ဖြစ်ပါတယ်။ ကျနော်ပါဝင်ခဲ့တဲ့ အဲဒီတပိုတိုက်ပွဲကတော့ အဲဒီရွာမှာဖြစ်ခဲ့တဲ့ ပထမဆုံး တိုက်ပွဲတော့ မဟုတ်ပါဘူး။ အဲဒီအကြိမ် မတိုင်ခင်ကလည်း ကျောင်းသားတပ်မတော်နဲ့ အဲဒီအချိန်က န၀တ စစ်အစိုးရရဲ့ တပ်ဖွဲ့တွေအကြား တိုက်ပွဲတွေ ဖြစ်ပွားခဲ့ဖူးရာမှာ တပိုရွာက စေတီအနီး ဖြစ်ပွားခဲ့တဲ့ တိုက်ပွဲမှာတော့ ကျောင်းသား တပ်မတော်က တပ်စုမှူးဇော်နိုင်အောင် (ထားဝယ်ကောလိပ်ပထမနှစ် သို့မဟုတ် ဒုတိယနှစ်ကျောင်းသား) ကျဆုံးခဲ့ဖူးပါတယ်။ ကျနော်ပါဝင်ပြီး ဖြစ်ပွားခဲ့တာက ဒုတိယအကြိမ် ဖြစ်ပါတယ်။ အစက အဲဒီရွာမှာ တိုက်ပွဲဖြစ်မယ်လို့ ထင်မထားခဲ့ပါ။ အချိန်က ၁၉၉၃ ခုနှစ် ဇန်န၀ါရီလ (၁၇) ရက်နေ့ ဖြစ်ပါတယ်။ စတင်ဖြစ်ပွားချိန်က မနက် (၁၀) နာရီ ကျော်ကျော်လောက်မှာ ဖြစ်ပါတယ်။

ဒေါက်တာ နိုင်အောင်၊ မိုးသီးဇွန်အပါအဝင် ABSDF တပ်ဖွဲ့ဝင်များကို ပြန်လည် ပေါင်းစည်းရေး ညီလာခံမှာ တွေ့ရစဉ်

အဲဒီတိုက်ပွဲ မဖြစ်ပွားခင် အခြေအနေလေးတွေကို အရင်ရေးသား တင်ပြရင် ပိုပြီးသင့်တော်မယ်ထင်လို့ အဲဒီတိုက်ပွဲ မတိုင်မီက နောက်ခံ အခြေအနေလေးတွေကို ပြန်လည် တင်ပြပါရစေ။ မြန်မာပြည်တောင်ပိုင်း ကေအန်ယူ တပ်မဟာ (၄) ဒေသ မြိတ်ထားဝယ်ခရိုင်တွင် အခြေစိုက်နေတဲ့ ကျောင်းသားတပ်မတော် တပ်ဖွဲ့တွေမှာ တပ်ဦးမကွဲခင် တပ်ရင်း (၂၀၁) မင်းသမီးစခန်းတပ်ဖွဲ့နဲ့ တပ်ရင်း (၂၀၃) မို့တောင်စခန်းတပ်ဖွဲ့ နှစ်ခုသာရှိပေမဲ့ ၁၉၉၂ ခုနှစ် မကဒတ (ABSDF) ကွဲပြီးစ ကာလမှာတော့ တပ်ရင်း (၅) ခု အထိ ဖြစ်လာပါတယ်။ တပ်ရင်း (၂၀၁) ကဘဲ (၃) ခု ဖြစ်လာပါတယ်။ အကြမ်းအားဖြင့် ခေါ်မယ်ဆိုရင်တော့ ၂၀၁ (ဒေါက်တာနိုင်အောင်ဦးစီး) ကျနော်တို့အုပ်စု၊ ၂၀၁ (မိုးသီးဇွန်ဦးစီး) ကိုကျော်ယျတို့ အုပ်စုနဲ့ ၂၀၁ ဘက်မလိုက် ကိုဝင်းထိန် (ထက်အောင်ကျော်) တို့ အုပ်စုဖြစ်ပြီး ၂၀၃ (ဒေါက်တာနိုင်အောင်ဦးစီး) ကိုသောင်းထွန်းတို့ အုပ်စုနဲ့ ၂၀၃ (မိုးသီးဇွန်) ကိုထိန်လင်းတို့ အုပ်စု ဖြစ်ကြပါတယ်။ ၂၀၁ (မိုးသီးဇွန်ဦးစီး) ကိုကျော်ယျတို့က ၂၀၂ အနေနဲ့ ရပ်တည်ဖို့ အတော်ကို ကြိုးစားခဲ့ပါသေးတယ်။ တပ်မဟာမှူး ဗိုလ်မှူးကြီး အော်လီဗာက တပ်ရင်းအသစ်နံပါတ်နဲ့တော့ မလုပ်ပါနဲ့ဆိုပြီး အကြံပေးလို့ ဆက်လုပ်ဖြစ်သလား မလုပ်ဖြစ်သလား ဆိုတာ ကျနော်လဲ မမှတ်မိတော့ပါ။ ဒါပေမဲ့ ဒီအေဘီ စစ်ဆင်ရေး အစည်းအဝေးတွေမှာ တပ်မဟာမှူးကပဲ အကြံပေးလို့ ကျနော်တို့ဆိုရင် ၂၀၁ (ဇင်ယော်) ဘက်မလိုက်ဆိုရင် ၂၀၁ (လင်းယုန်) လား မသိဘူး ဖွဲ့ခေါ်ဖြစ်ပါတယ်။ ၂၀၃ နှစ်ရင်းကတော့ ၂၀၃ ဂျိုးသိန်းနဲ့ ၂၀၃ စွန်ရဲဆိုပြီး လူပုဂ္ဂိုလ်နာမည်တွေအစား ငှက်နာမည်များနဲ့ တပ်ဖွဲ့များကို ခွဲခြား သတ်မှတ်ခဲ့ကြပါတယ်။ န၀တ ကလည်း တချိန်တည်းမှာ အမျိုးသားညီလာခံကို ကျင်းပဖို့ စိုင်းပြင်းလာနေတဲ့ အချိန် ဖြစ်ပါတယ်။

အပိုင်း - (၂) ကို နောက်တပတ်မှာ ဆက်လက် တင်ပြသွားပါမယ်ခင်ဗျား။