Thursday, May 30, 2013

ပြည်သူ အင်အား ရှိမှ တိုင်းပြည် အင်အား ရှိမယ်။

(Kachin Duwa)

ဒီနေ့ခေတ်မှာ တိုင်းပြည်တခု ရဲ့ အင်အားကို နိုင်ငံတော် စုစုပေါင်း ၀င်ထွက် ဘဏ္ဍဖြစ်တဲ့ Gross Domestic Product (GDP) နဲ့ နှစ်စဉ်ရသုံးငွေ ရာထားချက် Budget များကို ကြည့်ပြီး ခန့်မှန်းလေ့ ရှိပါတယ်။ လူအင်အား နဲ့လဲ ဆိုင်သင့်သလောက်ပဲ ဆိုင်ပါတယ်။

အဲဒီ GDP တက်လာဖို့ ဆိုတာ ပြည်သူ တစ်ယောက်ချင်းဆီရဲ့ ၀င်ငွေ ထွက်ငွေ၊ သုံးဖြုန်းနိုင်မှု (၀ယ်လိုအား)၊ ထုတ်ကုန်၊ ပို့ကုန်၊ သွင်းကုန်၊ စတာတွေကို တွက်ချက်ရတာ ဖြစ်ပါတယ်။



ဒီအရာတွေ အားလုံးပေါ် မူတည်ပြီး နိုင်ငံတော် အခွန်ဘဏ္ဍကလဲ တက်လာတတ်ပါတယ်။ အခွန်ဘဏ္ဍတက်လာတာနဲ့အမျှ ၀န်ထမ်းလစာ တွေ အလိုလို တိုးလာမယ်။ တိုင်းပြည်ရဲ့လိုအပ်သမျှ အသုံးစရိတ် တက်လာမှာ ဖြစ်တယ်။ အဲဒီ အထဲမှာ တပ်မတော် အသုံးစရိတ်လဲ အပါအ၀င် ပေါ့။

ဒီတော့ တိုင်းပြည်အင်အားရှိမှ တပ်မတော် အင်အားရှိတာပါ။ တိုင်းပြည်အင်အားရှိဖို့ ဆိုတာ ပြည်သူ တစ်ယောက်ချင်းရဲ့ ၀င်ငွေ၊ ကျန်းမာရေး၊ ပညာရေး၊ ဥပဒေ စိုးမိုးရေး၊ တရားမျှတရေး စတဲ့ အခြေခံ လိုအပ်ချက် တွေက မရှိမဖြစ်လိုအပ်လာတယ်။
ပြီးခဲ့တဲ့ ဆယ်စုနှစ် ၅၀ ခန့်လောက်ကတော့ အဲဒီ တပ်မတော် ဆိုတာကြီးက ပြောင်းပြန် အိုင်ဒီယာ တွေနဲ့ စလာတယ်။ တပ်မတော် အင်အားရှိမှ တိုင်းပြည်အင်အား ရှိမယ်.. ဆိုပါကလား... အဲဒါကြောင့်လဲ ဒီ အိုင်ဒီယာ ရဲ့ နောက်ကွယ်မှာ ထွက်လာတဲ့ အဖြေကတော့ ရှင်းရှင်းလေးပါ။ ကမ္ဘာအဆင်းရဲဆုံး နိုင်ငံ ဖြစ်လာတာပါပဲ။ သန်း ၆၀ ရှိတဲ့ တိုင်းပြည်က လေးသန်းလောက်ပဲ ရှိတဲ့ တိုင်းပြည်လောက် အင်အားမရှိဘူး ဖြစ်သွားတယ်။ (စင်ကာပူ၊ နော်ဝေး တွေဟာ လူဦးရေ လေးသန်းလောက်ပဲ ရှိတာပါ။)

ဒီတော့ ပြည်သူတွေ အင်အားရှိအောင် ဘယ်လို လုပ်ရမယ် ဆိုတာ စဉ်းစားရအောင်ပါ။ ပထမ ဆုံး လုပ်ရမှာက မလိုအပ်တဲ့ စစ်အသုံးစရိတ်တွေ ဖြတ်တောက်ပြီး ပညာရေး နဲ့ ကျန်းမာရေး မှာ ရင်းနှီးမြုပ်နှံ ရမယ်။ ပြည်သူ တစ်ယောက်ချင်း ကျန်းမာရေးဟာ တိုင်းပြည်ရဲ့ အင်အား ဖြစ်ပါတယ်။ လူတွေ ကျန်းမာမှ အလုပ်လုပ် နိုင်မယ်။ ဒါမှ မိသားစု တိုင်း ၀င်ငွေ တိုးလာမယ်။ သူတို့ သားသမီး တွေ ပညာတတ်လာမယ်။ တိုင်းပြည်အခွန်ဘဏ္ဍ တိုးလာမယ်။။ စသည်ဖြင့်ပေါ့။ ကလေးတောင် သိပါတယ်။

စစ်အင်အား ဘာလို့ လိုအပ်သလဲ? ဆင်ခြေကတော့ တိုင်းတပါးရန် ကာကွယ်ဖို့ လို့ ပြောလိမ့်မယ်။ ဒီခေတ် တိုင်းတပါးရန်စမှု ဆိုတာ မရှိသလောက်ပါ။ အခုလက်ရှိ တပ်မတော် အင်အားကို ကြောက်လို့ ရန်မစ တာ မဟုတ်ပါဘူး၊ ခေတ် မဟုတ်တော့လို့ပါ။ ဒီတော့ တိုင်းရင်းသား ဗိုလ်ကျ စိုးမိုးနိုင် ဖို့ ဆိုတာ အပေါ်တင် မပြောပဲ လက်တွေ့မှာက ဒီသဘော ဖြစ်နေပါတယ်။ တိုင်းရင်းသား တွေကလဲ မရသေးတဲ့ အခွင့်အရေး အတွက် တိုက်ပွဲဝင်နေတာပဲ။ ဒီတော့ အဲဒီ အခွင့်အရေး တွေကို ဘာဖြစ်လို့ မပေးနိုင်ရသလဲ။ ပေးလဲ ပေးသင့်တဲ့ အခွင့်အရေး တွေပါ။ အစိုးရက ပြောပြောနေတဲ့ "ကိုယ့်ညီနှောင် တိုင်းရင်းသားများလို့" တကယ် သဘောရိုးနဲ့ သတ်မှတ်ရင် မပေးနိုင်စရာ အကြောင်းမရှိ။ တရုတ်၊ ကုလားမျိုးနွယ်တွေ ဆိုရင်တော့ တမျိုးပေါ့။ ဘာဖြစ်လို့ တိုင်းရင်းသား တွေကို နှိပ်ကွပ်ဖို့ လောက်ပဲ စစ်စရိတ် အကုန်ခံနေရတာလဲ။ မလိုအပ်တဲ့ သုံးဖြုန်းမှု မဟုတ်ပေဘူးလား။

တကယ်တော့ တိုင်းရင်းသား လက်နက်ကိုင် အဖွဲ့တွေကို ပြည်သူ့စစ်လုပ်ခိုင်းလိုက်၊ နယ်ခြားစောင့်တပ်လုပ်ခိုင်းပြီး လုပ်စားခိုင်းလိုက် လုပ်နေတာဟာ ပြည်သူတွေအတွက် ပိုဒုက္ခများစေတယ်။ အဲဒီ နယ်ခြားစောင့်တပ်တွေက တမောက် ဗိုလ်ကျတာ ခံရတယ်။ တကယ်တော့ နယ်ခြားစောင့်တပ် နဲ့ ပြည်သူ့စစ် လုပ်ခိုင်းတာဟာ တပ်မတော် အင်အား ပိုတိုးအောင် လုပ်နေခြင်းသာ ဖြစ်ပါတယ်။ တကယ် စစ်မှန်တဲ့ တိုင်းရင်းသား အခွင့်အရေးတွေကို လစ်လျှူရူ့နေမှုလဲ ဖြစ်ပါတယ်။ ဒါတွေ မလိုပါဘူး။ တကယ်သာ ပွင့်ပွင့်လင်းလင်း နဲ့ တိုင်းရင်းသား အခွင့်အရေး အတွက် အလုပ်လုပ်ပါ။ မဖြစ်လာနိုင်စရာ အကြောင်းမရှိပါ။ စစ်မှန်တဲ့ တော်လှန်ရေး သမားများဟာ ဘယ်တော့မှ ပြည်သူ့လိုအင်ဆန္ဒ နဲ့ ဆန့်ကျင်ပြီး မသွားဘူး။ ကချင်လူမျိုး နဲ့ တိုင်းရင်းသားတိုင်းရဲ့ စိတ်ဓါတ်ဟာ လွတ်လပ်ခြင်းနဲ့ တရားမျှတခြင်း ဆိုတဲ့အရာကို ငတ်မွတ်နေခဲ့တာ ဖြစ်တယ်။

တဖက်မှာ ဖက်ဒရယ် လုပ်ဖို့ အစီအစဉ် ရှိတယ် ပြောပြီး၊ ၂၀၀၈ အခြေခံ ဥပဒေ ပြင်ဆင်ဖို့တော့ နှောက်နှဲနေတယ် ဆိုတာ အဆီအလျှော်မတည့် တဲ့ လုပ်ငန်းစဉ်ပါ။

တိုင်းပြည်ကို တကယ်အင်အား ရှိစေချင်လျှင် တိုင်းရင်းသား အပါအ၀င် နိုင်ငံသား အားလုံး ရဲ့ လူတစ်ဦးချင်း အင်အားဟာ အရေးအကြီးဆုံးပါ။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။