Monday, June 10, 2013

၂ဝ၁၅ ရွေးကောက်ပွဲနှင့် ပြည်သူ့လိုအပ်ချက်

(Mizzima)

အတိုက်အခံခေါင်းဆောင် ဒေါ်အောင်ဆန်းစုကြည်က သမ္မတအဖြစ် ရည်မှန်းချက် ရှိထားကြောင်း လူသိ ရှင်ကြား ပြောဆိုထားပြီး ဖြစ်သည်။ အလားတူ ပြည်သူ့လွှတ်တော် ဥက္ကဋ္ဌ သူရဦးရွှေမန်း ကလည်း သူ့အနေနှင့် ၂ဝ၁၅ ရွေးကောက်ပွဲအပြီးတွင် သမ္မတ ဦးသိန်းစိန် နေရာကိုဆက်ခံရန် စိတ်ဝင်စားကြောင်း Irrawaddy မဂ္ဂဇင်းနှင့် တွေ့ဆုံမေးမြန်းရာတွင် ဆိုသည်။

ယခုအချိန်သည် ၂ဝ၁၅ ရွေးကောက်ပွဲအတွက် အဓိကဦးတည်ထား၍ ပြောဆိုလုပ်ဆောင်ရန် အသင့်တော်ဆုံး အချိန် ဖြစ်နေပါပြီလော။ ဒေါ်အောင်ဆန်းစုကြည်ကလည်း သမ္မတ နေရာရယူယှဉ်ပြိုင်နိုင်ရန် ဖွဲ့စည်းပုံအခြေခံ ဥပဒေကို ပြင်ဆင်ရန်လိုအပ်သည်ဟု ပြောဆိုထားသည်။

သို့သော် ဖွဲ့စည်းပုံ အခြေခံဥပဒေကို ပြင်ဆင်ပြီး ဒေါ်အောင်ဆန်းစုကြည် သမ္မတအဖြစ် ဝင်ရောက်အရွေးချယ်
နိုင်ရန်သာ အာရုံမစိုက်သင့်ပေ။ ဒီမိုကရေစီ စံနှုန်းများနှင့် လိုက်လျောညီထွေ ကိုက်ညီသော၊ တိုင်းရင်းသား လူနည်းစုများ၏ တန်းတူမှုကို အာမခံပေးနိုင်သော၊ နိုင်ငံသားတိုင်း၏ အခြေခံအခွင့်အရေးကို အကောင်အထည်
ဖော်ပေးသော၊ တပ်မတော်နှင့် နိုင်ငံရေးအာဏာကို တိတိကျကျခွဲခြားထားသော ဖွဲ့စည်းပုံ အခြေခံဥပဒေ တစ်ခုအဖြစ် ပြောင်းလဲရန် လိုအပ်ပေသည်။

ဒေါ်အောင်ဆန်းစုကြည် သမ္မတရာထူးရယူနိုင်ရန် ဖွဲ့စည်းပုံအခြေခံဥပဒေ ပြင်ဆင်ရေးကို အလေးထားနေမည့်အစား၊ လာမည့် ၂ဝ၁၅ မတိုင်ခင် ပို၍ဘက်စုံပြည့်ဝသည့် ဒီမိုကရေစီ ဖြစ်ထွန်းလာစေရေး၊ ပြည်သူများ၏ လိုအပ်ချက်များကို ပိုမို ဖြည့်ဆည်းပေးနိုင်ရေးကို အလေးထား မလုပ်ဆောင်သင့်ဘူးလော။ လက်ရှိအခြေအနေတွင် မြန်မာပြည်သူ
ပြည်သားများ အတွက် ဖြစ်နိုင်သမျှ အစွမ်းကုန် ပိုမိုအာဏာခွန်အား ရှိလာစေရန် မကြိုးပမ်းသင့်ပေဘူးလား။

အကယ်၍ အမျိုးသားဒီမိုကရေစီအဖွဲ့ချုပ် (NLD) နှင့် ဒေါ်အောင်ဆန်းစုကြည်တို့ ၂ဝ၁၅ ရွေးကောက်ပွဲတွင် အနိုင်ရရှိခဲ့ပါက၊ မြန်မာနိုင်ငံ၏ ဒီမိုကရေစီကျင့်စဉ်အတွက် အထွတ်အထိပ်ကာလ ဖြစ်ပေလိမ့်မည်။ သို့သော်လည်း
မြန်မာနိုင်ငံရှိ ပြည်သူလူထုများလက်ထဲတွင် ခွန်အားအာဏာ ရှိမနေပါက၊ သို့မဟုတ် စွမ်းအားများ အားလျော့
နေပါက၊ ဤရွေးကောက်ပွဲ အောင်ပွဲသည် မြန်မာနိုင်ငံရှိ ရေပေါ်ဆီ လူနည်းစုတို့အတွက် အခွင့်ထူးခံ အနေအထား ကို ပို၍အားဖြည့်ပေးသည့်သဖွယ်သာ ရှိစေလိမ့်မည်။

ရွေးကောက်ပွဲများက ဒီမိုကရေစီလုပ်ငန်းစဉ်အတွက် ပြယုဂ်သင်္ကေတတစ်ခု ဖြစ်သော်လည်း ကဏ္ဍအစိတ်အပိုင်း တစ်ခုမျှသာ ဖြစ်သည်။ ပြည်သူလူထုများက သူတို့ကိုယ်တိုင် သူတို့၏ လူမှုအသိုင်းအဝိုင်း၊ နိုင်ငံကိုပုံသွင်းခွင့်ရှိရန် အာဏာအပြည့်အဝ အပ်နှင်းထားကြသည့် ပုံမှန်လည်ပတ်နေသော ဒီမိုကရေစီနိုင်ငံများတွင်တော့ ရွေးကောက်ပွဲ များက အရေးအကြီးဆုံး ကိစ္စတစ်ခုတော့ မဟုတ်ပေ။

အမှန်ကိုဆိုရလျှင် ကမ္ဘာပေါ်ရှိ မည်သည့်နိုင်ငံကမျှ ပုံမှန်ဒီမိုကရေစီ အပြည့်အဝဖြင့် လည်ပတ်အုပ်ချုပ်နေကြသည် မဟုတ်ပါ။ လုပ်ငန်းစဉ်များအရ ဆောင်ရွက်နေကြသည့် ဒီမိုကရေစီနှင့် အပြည့်အဝ ပုံမှန်လည်ပတ်နေကြသည့် ဒီမိုကရေစီတို့အကြား အဆင့်အလွှာများစွာ ရှိနေပါသေးသည်။

သေချာသည်မှာ နောက်ထပ် ၂ဝ၁၅ ခုနှစ် အထွေထွေ ရွေးကောက်ပွဲအတွက် မဲဆွယ်စည်းရုံးကြမည့်အချိန် မလွဲမသွေ ကျရောက်လာတော့မည်။ ဤရွေးကောက်ပွဲတွင် အောင်နိုင်မည့်သူမှာလည်း ပြီးခဲ့သည့် ရာစုနှစ်
လေးပုံတစ်ပုံခန့်က ပြည်သူတို့၏ အသည်းနှလုံးကို သိမ်းသွင်း ဆွဲဆောင်ထားနိုင်ခဲ့သည့် ပုဂ္ဂိုလ်၊ သို့မဟုတ်
နိုင်ငံရေးပါတီ အမျိုးသားဒီမိုကရေစီ အဖွဲ့ချုပ် ( NLD) ဖြစ်ဖွယ် ရှိပါသည်။ သို့သော် လက်ရှိအချိန်တွင်
နိုင်ငံသားပြည်သူ တစ်ဦးချင်းစီ၏ အခြေအနေများ မြင့်မားလာစေရေးအတွက် လေးနက်စွာ ဆောင်ရွက်ပြီးစီးရမည့် လုပ်ငန်းများ ရှိနေပါသည်။

သို့မဟုတ်ပါက မြန်မာနိုင်ငံ၏ ဖြစ်ပေါ်တိုးတက်မှုမှာ၊ အထူးသဖြင့် Human Security ဟုခေါ်သော လူသား တိုင်း၊ နိုင်ငံသားတိုင်း၏ ဘဝလုံခြုံမှု အာမခံနိုင်ရေးနှင့် ခိုင်မာရေးတို့ကို ဆက်လက်ထိခိုက်နစ်နာ နေဦးမည်သာ
ဖြစ်သည်။ ရွေးကောက်ပွဲတစ်ခု၊ ရွေးကောက်ပွဲတစ်ကြိမ်၏ ရလဒ်သက်သက် အနေဖြင့်သာဆိုလျှင်တော့ လက်ရှိ အမြစ်တွယ်နေသည့် မတရားမျှတမှုများ၊ လူတန်းစား မညီမျှမှုများကို ပို၍ ထွန်းပြောင်နေစေဖို့သာ ရှိသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။