Friday, June 14, 2013

ထောက်လှမ်းရေးအဖွဲ့ကို ပြုပြင် ဖွဲ့စည်းခြင်း - အပိုင်း (၁)

(စည်းလုံးခြင်းရဲ့အင်အား)

အစ္စရေး အမျိုးသား ထောက်လှမ်းရေး အေဂျင်စီ Mossad ရဲ့ တရားဝင် ဝက်ဘ်ဆိုဒ်

ဆောင်းပါးရှင် - ပီတာဇီမန်း

ပီတာဇီမန်း။ ။ သဘာဝ သိပံ္ပဖြင့် ဘွဲ့ရသည်။ ၁၉၆၀ ပြည့်လွန်နှစ်များ အဆုံးပိုင်းတွင် ကျောင်းသား လှုပ်ရှားမှု များတွင် တက်ကြွစွာ ပါဝင်ခဲ့သည်။ ၁၉၇၀ နှင့် ၁၉၈၀ လွန်နှစ်များအတွင်း သူ့ကို သဘောဝ သိပံ္ပ ပညာဖြင့် အလုပ်လုပ်ခွင့် မပြုသဖြင့် ကာယလုပ်သားအဖြစ် နောက်ပိုင်း နည်းပညာရှင်အဖြစ် အသက်မွေးသည်။ ၁၉၉၇ ခုနှစ်တွင် ပဋိညာဉ် စာတမ်း (၇၇) ကို လက်မှတ်ထိုးသည်။ ၁၉၉၀ ပြည့်နှစ်တွင် မြို့တော် ကော်မတီဝင် ဖြစ်လာသည်။ ၁၉၉၀ မှ ၁၉၉၈ ခုနှစ်အထိ အရပ်ဘက် တန်ပြန် ထောက်လှမ်းရေး၌ အမှုထမ်းသည်။ ၁၉၉၈ နှင့် ၂၀၀၁ ခုနှစ်အတွင်း အရပ်ဘက် ပြည်ပ ထောက်လှမ်းရေး အဖွဲ့ အကြီးအကဲ ဖြစ်လေသည်။  နိုင်ငံအသီးသီး၊ အစိုးရအမျိုးမျိုး၊ သမိုင်းကာလအထွေထွေရှိ ထောက်လှမ်းရေး၊ လုံခြုံရေးဌာနတို့ အသုံးပြုတဲ့ အရာတွေဟာ သဘောတရားအနေနဲ့ သိပ်မခြားနားလှပါဘူး။ လျှို့ဝှက်သတင်းပေးတွေကို သတင်းရရာ ရကြောင်း အခြေခံ အရင်းအမြစ် တစ်ခုအနေနဲ့ အားလုံးက သုံးကြပါတယ်။ ထောက်လှမ်းဖို့၊ စောင့်ကြည့်ဖို့၊ သက်သေအထောက်အထား ရဖို့ ပစ္စည်း ကိရိယာတွေကို အားလုံးက သုံးကြပါတယ်။ နည်းပညာအဆင့်မှာပဲ ကွာကြတာပါ။ လျှို့ဝှက်မှု၊ လုံခြုံမှု၊ သတင်းကွာခြားလိုမှုတွေကို အားလုံးက လိုက်နာ စောင့်ထိန်းကြတယ်။ အထူး အခွင့် အာဏာကို အားလုံးက ကျင့်သုံးကြတယ်။


ဒါပေမဲ့ ဌာနအသီးသီးရဲ့ ရည်မှန်းချက်တွေကတော့ လုံးဝ ကွဲပြား ခြားနားကြတယ်။ ဒီမိုကရေစီ နိုင်ငံတွေမှာ ရှိတဲ့ ထောက်လှမ်းရေး ဌာနတွေက တိုင်းပြည်နဲ့ လူမျိုးကို ပြည်တွင်းပြည်ပ အန္တရာယ်က ကာကွယ်ပေးတယ်။ အာဏာရှင် နိုင်ငံတွေမှာ ရှိတဲ့ ထောက်လှမ်းရေးတွေကတော့ သူတို့ အစိုးရအဖွဲ့နဲ့ အခွင့်ထူးခံ လူတစ်စုကိုသာ ကာကွယ်ပေးတယ်။ အာဏာရှင်နိုင်ငံတွေမှာ ထောက်လှမ်းရေး၊ လုံခြုံရေး ဌာနတို့ဟာ လျှို့ဝှက်ရဲအဖွဲ့ ဖြစ်လာ ကြတယ်။ သူတို့ရဲ့ တာဝန်ဟာ အတိုက်အခံ အဖွဲ့နဲ့ အဖွဲ့ဝင်တွေကို နှိပ်ကွပ်ဖို့ ပြည်သူတို့ကို ထိန်းချုပ်ဖို့ ဖြစ်တယ်။ ဥပဒေရဲ့အထက်မှာ နေလေ့ရှိကြတယ်။

အာဏာရှင်တွေ ဆုံးရှုံးပြိုပျက်ပြီးနောက် အသစ် ပေါ်ပေါက်လာတဲ့ လွတ်လပ်တဲ့ လူ့အဖွဲ့အစည်းရဲ့ ပဓာန တာဝန်ဟာ လက်ရှိ လျှို့ဝှက်ရဲအဖွဲ့ကို ဖျက်ပစ်ဖို့ ဖြစ်တယ်။ အဲဒါဟာ ခေတ်ပြောင်း တော်လှန်ရေး အောင်မြင်ဖို့ အဓိကကျတဲ့ တာဝန်ဖြစ်တယ်။ ဒီအတွက် အနည်းဆုံး အကြောင်း နှစ်ချက် ရှိတယ်။ လျှို့ဝှက်ရဲအဖွဲ့ရဲ့ လုပ်ပိုင်ခွင့်ကို ရုတ်သိမ်းလိုက်ခြင်းအားဖြင့် အရင်လမ်းစဉ်ကို ပြန်ဦးမလှည့်တော့ဘူး ဆိုတာ ပွင့်လင်းတဲ့ လူ့အဖွဲ့အစည်းက စိတ်ချစေနိုင်တယ်။ လမ်းစဉ်ဟောင်းနဲ့ ပြတ်စဲကြောင်း ထင်ထင်ရှားရှား လက္ခဏာပြပြီး ပြည်သူနဲ့ ကမ္ဘာကို ယုံကြည်သွားစေတယ်။ ဒါနဲ့တောင် ဒီအချိန်ထိ ချုပ်တည်း ပုန်းကွယ်နေတဲ့ အထင်ရှားဆုံး ခြိမ်းခြောက်မှုတွေဟာ ကြွတက် လာကာ ဆိုးဝါးတဲ့ ရာဇဝတ်မှုအဖြစ် ပွင့်လင်းတဲ့ လူ့အဖွဲ့အစည်းမှာ ပေါ်ထွက်လာတယ်။ ခြိမ်းခြောက်မှုတွေအနက် အမြင်သာဆုံးက ဆိုးရွားတဲ့ ရာဇဝတ်မှု ပုံစံသစ် ပေါ်ထွက်လာ ခြင်း ဖြစ်တယ်။ နိုင်ငံရေး အထက်စီး ရသူ လူသစ် တစ်စုဟာ ထောက်လှမ်းရေးနဲ့ လုံခြုံရေး ဌာနသစ် တည်ထောင်မလား၊ အာဏာရှင် အစိုးရ ကျဆုံးပြီးနောက် ရှိနေတဲ့ ဌာနဟောင်းကို ချက်ချင်း ဆိုသလို ပြုပြင် ဖွဲ့စည်းမလား ဆိုတဲ့ တာဝန်နဲ့ ရင်ဆိုင်နေရတယ်။


ဗြိတိသျှ Mi6 ရဲ့ စစ်ထောက်လှမ်းရေး တံဆိပ်

ထောက်လှမ်းရေး အဖွဲ့အစည်း တစ်ခုမှာ ဖွဲ့စည်းပုံအရ ကွဲပြားတဲ့ အဖွဲ့အစည်း လေးခုက အများဆုံး ဆောင်ရွက်တဲ့ အဓိက ကဏ္ဍ လေးရပ် ရှိတယ်။ အဲဒါတွေက ပြည်ပ စစ်ဘက် ထောက်လှမ်းရေး၊ ပြည်ပ ထောက်လှမ်းရေး (အရပ်ဘက် ထောက်လှမ်းရေးလို့်လည်း သိကြတယ်)၊ စစ်ဘက် တန်ပြန် ထောက်လှမ်းရေးနဲ့ ပြည်တွင်း လုံခြုံရေးဌာန (အရပ်ဘက် တန်ပြန် ထောက်လှမ်းရေးလို့လည်း သိကြတယ်) တို့ဖြစ်ကြတယ်။ အာဏာရှင် နိုင်ငံတွေမှာ ထောက်လှမ်းရေး အဖွဲ့အစည်းတွေက လူ့အခွင့်အရေး ချိုးဖောက်မှု အတိုင်းအတာဟာ တစ်နိုင်ငံနဲ့ တစ်နိုင်ငံ မတူကြဘူး။ ချိုးဖောက်မှု အဆင့်ဟာ အထက်က စာရင်းအရ ပထမအဖွဲ့မှ နောက်ဆုံး အဖွဲ့ကို တိုးများသွားတယ်။ နောက်ဆုံး အဖွဲ့ဟာ သဘောသဘာဝအရ ထောက်လှမ်းရေး အဖွဲ့တောင် မဟုတ်တော့ဘူး။ တကယ်တော့ ဖိနှိပ်တဲ့ လျှို့ဝှက်ပုလိပ် အဖွဲ့သာ ဖြစ်တယ်။ ဒီမိုကရေစီ နိုင်ငံများမှာတောင် ပြည်သူတွေက ထောက်လှမ်းရေးအဖွဲ့ မတော်တရော် လုပ်မှာကို သံသယနဲ့ သတိထား ကြည့်တတ်ကြတယ်။ သူတို့ရဲ့ ကြောင့်ကြမှုဟာ ပြည်တွင်း တန်ပြန် ထောက်လှမ်းရေး ဌာနနဲ့ အများဆုံး ပတ်သက်တယ်။

ချက်ကိုစလိုဗေးကီးယားမှာ ၁၉၈၉ ခုနှစ် နိုဝင်ဘာလမတိုင်ခင်က ဒီကဏ္ဍတွေကို ဆက်လက် ဖေါ်ပြမဲ့ အဖွဲ့အစည်းများက ဆောင်ရွက်ကြတယ်။ ဒါတွေက ထောက်လှမ်းရေး ညွှန်ကြားရေးမှူးချုပ်ရုံး ZSGS၊ ပြည်ထောင်စု ပြည်ထဲရေး ဝန်ကြီးဌာန ဌာနစိတ် (၁)၊ ပြည်ထောင်စု ပြည်ထဲရေး ဝန်ကြီးဌာန ဌာနစိတ် (၃)၊ (စစ်ဘက် တန်ပြန် ထောက်လှမ်းရေး ဌာန VRR လို့လည်း သိကြတယ်)၊ ပြည်ထောင်စု ပြည်ထဲရေး ဝန်ကြီးဌာန ဌာနစိတ် (၂) (နိုင်ငံတော် လုံခြုံရေး ဌာန StB လို့လည်း သိကြတယ်) တို့ ဖြစ်ကြတယ်။

၁၉၈၉ ခုနှစ် နိုဝင်ဘာလနောက်ပိုင်း ချက်ကိုစလိုဗက်ကီးယား၊ နောက်တော့ ချက်သမ္မတနိုင်ငံမှာ သူ့ကဏ္ဍနဲ့သူ တာဝန်ယူ ဆောင်ရွက်ခဲ့ကြတဲ့ အဖွဲ့အစည်းတွေကတော့ အောက်ပါအတိုင်း ဖြစ်ပါတယ်။ စစ်ဘက် ထောက်လှမ်းရေး ဌာန (VZS)၊ (၁၉၉၄ ခုနှစ်မှာ ZSGS ဆီက လွှဲပြောင်း ရယူတယ်)၊ ပြည်ထောင်စု နိုင်ငံခြား ဆက်ဆံရေးနဲ့ ပြန်ကြားရေးရုံး၊ (၁၉၉၄ ခုနှစ်မှာ UZSI လို့ သိလာကြတယ်။ စစ်ဘက် ထောက်လှမ်းရေး ဌာန (VOZ) နဲ့ ဖွဲ့စည်းပုံ အခြေခံ ဥပဒေနဲ့ ဒီမိုကရေစီ ကာကွယ်စောင့်ရှောက်ရေးရုံး (UOUD) (အဲဒါက ၁၉၉၀ ပြည့်နှစ် ဒီဇင်ဘာလမှာ ပြည်ထောင်စု ပြန်ကြားရေးဌာန၊ ၁၉၉၁ ခုနှစ် ဇူလိုင်လမှာ ပြည်ထောင်စု လုံခြုံရေးနဲ့ ပြန်ကြားရေးဌာန၊ ၁၉၉၃ ခုနှစ်မှာ ချက်သမ္မတ နိုင်ငံ သတင်း လုံခြုံရေးဌာန ဖြစ်လာတယ်။ ၁၉၉၄ ခုနှစ်ကစလို့ သတင်း လုံခြုံရေးဌာန BIS လို့သာ သိလာကြတယ်) တို့ ဖြစ်ကြတယ်။

ချက်သမ္မတနိုင်ငံ အမျိုးသား ထောက်လှမ်းရေး အေဂျင်စီ SIS ရဲ့ တရားဝင် ဝက်ဘ်ဆိုဒ်

ဒီစာတမ်းတိုလေးမှာ အရပ်ဘက် ထောက်လှမ်းရေး အထူးသဖြင့် တန်ပြန်ထောက်လှမ်းရေး ဌာနနဲ့ ပတ်သက်လို့ ကျွန်တော် အဓိက တင်ပြပါမယ်။ စစ်ဘက် ထောက်လှမ်းရေး ဌာနတွေအကြောင်း ကျွန်တော် ဆွေးနွေးမှာ မဟုတ်ပါဘူး။ ဒါပေမဲ့ ကျွန်တော့် သဘောထား တစ်ခုကိုတော့ ပြောပြ လိုပါတယ်။ ပြည်ပ လုံခြုံရေးအပေါ် အာရုံစိုက်ထားတဲ့ ချက်စစ်ဘက် ထောက်လှမ်းရေး ဌာနက မိမိအခန်းကဏ္ဍ ပျောက်နေတဲ့ ပြဿနာကို ဖြေရှင်းပြီး ပြုပြင် ဖွဲ့စည်းရေးကို ပြီးပြတ်အောင် ဆောင်ရွက်နိုင်ဖို့ လိုပါသေးတယ်။ ၁၉၈၉ နှစ်ကုန်ပိုင်းနဲ့ ၁၉၉၀ ပြည့်နှစ် ပထမနှစ်ဝက်ပိုင်းမှာ (ပထမဆုံး ရွေးကောက်ပွဲအထိ) အာဏာလွှဲပြောင်း ရရှိထားတဲ့ နိုင်ငံရေး အင်အားစုမှာ ဒီမိုကရေစီအရေး လှုပ်ရှားခဲ့တဲ့ အုပ်စု အများအပြား ပါဝင်တယ်။ ဒီအုပ်စု တွေဟာ အစိုးရ စနစ် တကယ်ပြောင်းတဲ့ ကာလအတွင်းကျတော့မှ ပီပီပြင်ပြင် စုစည်း ထွက်ပေါ် လာကြတယ်။ အရင်အစိုးရနဲ့ သဘောကွဲလွဲသူတွေ အထူးသဖြင့် ပဋိညာဉ်စာတမ်း ၇၇ (Charter 77)၊ HOS နဲ့ တခြား အတိုက်အခံ အုပ်စုတွေက ပုဂ္ဂိုလ်တွေဟာ ခေါင်းဆောင်မှု အခန်းက ပါဝင်ကြမဲ့ သူတို့မှာ လိုအပ်တဲ့ တာဝန် အားလုံးကို ယူနိုင်ဖို့ရာ လူအင်အား နည်းလွန်းနေတယ်။ ဒီအပြင် သူတို့မှာ တချို့တာဝန်တွေကို ကိုင်တွယ် ဖြေရှင်းဖို့ရာ အဆင်သင့် မဖြစ်ကြသေးဘူး။ ဒီအချက်ဟာ နိုင်ငံတော် အာဏာကို ပြုပြင် ဖွဲ့စည်း တည်ဆောက်ဖို့ သူတို့ရဲ့ မျက်စိလည်စရာ ချဉ်းကပ်ပုံမှာ အတော်ပေါ်လွင်နေတယ်။ ဒီအချက်မှာ အတိတ်မှ လွတ်မြောက်အောင် အားထုတ်နေတဲ့ နဂိုတည်ရှိတဲ့ နိုင်ငံရေးပါတီများရော အသစ်ပေါ်လာတဲ့ ပါတီများပါ နောက်လိုက် နေရာမှာ ရှိနေကြပါတယ်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။